Esta celebración evócanos que a Igrexa fundada por Cristo é a Igrexa peregrina que como dicía santo Agostiño, camiña entre os consolos de Deus e as turbacións do mundo, quedando constancia nela de tantos mártires e santos. É o vigor da fe destas persoas o que nos axuda a ver non o triunfo visible da Igrexa senón o seu crecemento en profundidade. A historia da Igrexa acredita dun xeito fidedigno esta realidade. Nas súas páxinas vemos que “atraídos polo exemplo de Xesús e sostidos polo seu amor, moitos cristiáns, xa nas orixes da Igrexa, testemuñaron a súa fe co derramamento do seu sangue. Tras os primeiros mártires seguiron outros ao longo dos séculos ata os nosos días”. (D. Julian Barrio. Carta Pastoral na Beatificación dos Mártires en Tarragona 2013)
.
