A Xunta de Confrarías da Semana Santa de Santiago de Compostela
presentou onte ante os medios a exposición que levará a cabo esta fin de
semana, 23 e 24 de marzo, en San Domingos de Bonaval. No mesmo acto cos
medios, anunciaron que o pregoeiro da Semana Santa en Compostela neste
ano 2019 vai ser o arcebispo compostelán, monseñor Xulián Barrio Barrio.
Mañá sábado, dende as 10:00 e ata as 18:00 horas, en horario
ininterrompido, estarán expostos os traxes e estandartes das diferentes
Confrarías, ademais de proporcionar información de interese, datos e
peculiaridades sobre as mesmas. Por outra banda, estarán a disposición
dos asistentes os carteis da Semana Santa 2019, así como os programas,
nos que se reflexan os diferentes actos e desfiles procesionais que
terán lugar entre o 17 e o 28 de abril.
Cando finalice a exposición dará comezo, ás 18:00 horas, o acto
“Semanas Santas de Interese Turístico”, no que se levará a cabo un
coloquio coas Xuntas de Confrarías de Ferrol, Mondoñedo, Viveiro e
Santiago de Compostela. Acto, no que o acompañamento musical estará a
cargo da Escolanía da Catedral.
No caso do domingo 24, de 10:00 a 14:00 horas, retomarase de novo a
exposición, que terá carácter gratuíto para todos os asistentes.
A Xunta de Confrarías tamén deu a coñecer o nome do pregoeiro deste
ano 2019, no que, sendo un ano especial xa que será a primeira vez que
saen ás rúas coa distinción de Interese Turístico, estará a cargo do
arcebispo de Santiago, don Xulián Barrio.
Por este motivo a Xunta de Confrarías, adiantou respecto a outros
anos, a presentación da Semana Santa a este pasado mes de xaneiro, que
tivo lugar o 17 de xaneiro, na sala San Felipe Neri ubicada no Mosteiro
de San Martiño Pinario.
O presidente, José Muñiz, presentou o novo logo da Xunta de
Confrarías que adquire unha mellora respecto ao anterior, e no que se
aproveita a ocasión para incluír a distinción de “Festa de Interese
Turístico”. Tamén se deu a coñecer ese mesmo día o cartel da Semana
Santa 2019, que terá lugar do 12 ao 28 de abril. Un cartel que este ano
abandera a Confraría da Nosa Señora da Quinta Angustia, e no que ten
unha gran presenza a súa imaxe, unha obra do século XX do imaxineiro
Jesús Picón.
Como é ben sabido, as obras que se están a realizar na Catedral de
Santiago van facer que os itinerarios dalgunhas procesións sufran
modificacións este ano. As afectadas son: Virxe das Dores, Sermón do
Santo Encontro e Santo Enterro.
Archicompostela
